Forsíða

Øll hava rætt til góð barnaár

‘Øll hava rætt til góð barnaár‘ er heiti á tilboði til børn, ung og familjur, sum hava tað trupult, orsaka av at rúsdrekka og/ella rúsevnir fylla, ella hava fylt, ov nógv í heiminum. Vit veita ikki rúsviðgerð, men hjálpa serliga teimum, sum eru avvarðandi hjá einum ella fleiri við rústrupulleikum.

 

“Ongin eigur at vaksa upp við rúsaðum foreldrum!

Um børn og ung gera tað, skulu tey hava møguleika fyri at fáa hjálp.”

 

Vit arbeiða miðvíst við at varpa ljós á, at tað eru nógv børn og ung, ið vaksa upp í heimum har rúsurin fyllur ov nógv. Vit arbeiða fyri, at tabuevnið, um at vera barn og avvarðandi hjá rúsmisnýtarum, verður brotið, og vit arbeiða við at hjálpa hesum familjum.

Í hesum sambandi bjóða vit einstaklingasamrøður, bólkasamrøður og familjuviðgerð.

Bólkatilboðið
Børn og ung í aldrinum 8-25 ár, kunnu melda seg til bólk, har tey eru saman við øðrum børnum og ungum, sum eisini eru uppvaksin í heimum við rústrupulleikum. Bólkarnir verða deildir upp, soleiðis at luttakararnir eru so javnir í aldri sum gjørligt. Bólkarnir verða skipaðir eftir tørvinum hjá luttakarunum. Dentur verður lagdur á eina javnvág millum hugna, spæl og prát um tað, sum er trupult. Her verður tosað opið, um tað sum rørir seg hjá luttakararunum, og samstundis er eisini møguleiki fyri at koma, hóast man ikki ynskir at siga nakað.

Endamálið við bólkunum er m.a. at geva børnunum og teimum ungu møguleika til at:

  • Uppliva, at tey ikki eru tey einastu, sum hava foreldur við rústrupulleikum.
  • Tosa við onnur í líknandi støðu, um sínar kenslur og tankar.
  • Skilja, at tað ikki er teirra skuld at foreldrini nýta rúsdrekka/rúsevnir, og tað ikki er teirra ábyrgd at fáa tey at gevast.
  • Læra at seta mørk og ansa sær sjálvum.
  • Fáa kunnleika um tað at vera bundin av rúsevnum, og at fáa eina fatan av, hvat hendir við foreldrum, ið eru bundin av rúsdrekka/rúsevnum.

Einstaklingasamrøður til børn og ung
Um børn ella ung ikki ynskja at koma í bólk, men hava tørv á onkrum at tosa við, er gjørligt at fáa samtalur hjá einum av sálarfrøðingunum ella terapeutunum hjá okkum. Summi børn eru eisini ov ung til at koma í bólk, og hesi fáa tí í boði at fáa einstaklingaviðgerð í staðin. Tá hesi børnini koma til viðgerð, hava vit javnan samrøður við foreldrini eisini.

Einstaklingasamrøður til vaksin
Foreldur hava møguleika fyri at fáa barnafokuseraðar samrøður og ráðgeving í mun til at handfara familjulívið, tá rúsur er ein trupulleiki. Her verður dentur lagdur á børnini, og hvussu hesi kunnu verða vard sum best eftir umstøðunum. Foreldur at børnum, sum eru heilt smá, og tí ov lítil til viðgerð, fáa eisini hetta bjóðað.

Familjusamrøður og familjuviðgerð
Familjurnar hjá teimum børnunum og ungu (undir 18), sum koma í bólk ella til samtalur hjá okkum, verða altíð bjóðaðar inn til eina samrøðu, har prátað verður um hvussu rúsurin fyllir í heiminum. Umframt hetta bjóða vit familjuviðgerð til familjur, um tær hava tørv á tí. Eisini til familjurnar hjá teimum ungu, sum eru yvir 18, um tey ynskja tað. Endamálið við familjuviðgerðini er at hjálpa familjunum at tosa um hetta evnið, sum kann vera so torført at tosa um. Fokus er eisini her serliga á børnunum og teimum ungu, soleiðis at tey fáa sett orð á sínar tankar og kenslur yvirfyri sínum foreldrum.

Tilboðini
Øll tilboðini hjá “Øll hava rætt til góð barnaár” eru ókeypis, og kunnu halda áfram so leingi tørvur er á tí. Tað krevst eingin ávísing (t.d. frá lækna), fyri at luttaka í tilboðnum. Har er onki krav um, at foreldrini skulu hava verið í viðgerð. Hava tey verið í viðgerð, er onki krav um hvar viðgerðin skal vera farin fram. Tilboðið er fyri allar familjur, sum hava, ella hava havt, rústruplleikar heima. Hetta merkir, at ein kann eisini melda seg til, hóast foreldrið t.d. ikki hevur rúsað seg í longri tíð. Hetta kemst av, at nógv uppliva, at rústrupulleikin er burtur, men at avleiðingarnar og tann neiliga ávirkanin á familjuna og tey sjálvi, situr eftir.

Her eru nakrir setningar, sum børn og ung hava sagt til eftirmetingarsamrøður
Genta 14 ár: “Tað var ræðuligt alla tíðina at goyma, at babba drakk
Genta 15 ár: “Pápi mín fór at drekka, tá eg var fødd, og tí havi eg altíð følt, at tað er mín skyld, at hann drekkur. Tá ið eg byrjaði í bólkinum, fann eg útav, at tað er ikki mín skyld
Drongur 10 ár: “Eg fann útav, at tað eri ikki bara eg
Genta 12 ár: “At møta øðrum, sum eru í líknandi støðu, hevur gjørt, at eg ikki kenni meg so einsamalla meira, og eg skilji nú, at tað er ikki mín skyld, at mamma drekkur
Drongur 16 ár: “Eg vænti ongantíð, at eg fari at gloyma tað, sum hendi í bólkinum. Tað er í fleiri førum hent, at eg havi hugsað um okkurt, sum onkur segði, ella okkurt, sum vit gjørdu, og tað hjálpir mær

Karmar
Vit halda til í Kongagøtu 8, Tórshavn, og á Heiðavegi 32, Saltangará. Nógvar av familjusamtalunum verða hildnar heima hjá familjunum kring landið.

Ver vælkomin við
Ynskir tú, ella onkur tú kennir, at fáa hjálp frá okkum, ella vilt tú vita meira, ert tú vælkomin til at seta teg í samband við okkum:

Teldupost: 
Telefon: 770709
Facebook: www.facebook.com/Øll-hava-rætt-til-góð-barnaár

Hetta er ein teknifilmur, ið lýsir eina støðu hjá einum barni, tá mamman hevur rúsdrekkatrupulleikar og hvussu tað hjálpir at tosa um tað.
https://www.youtube.com/watch?v=-4V38G-OERg&feature=youtu.be